العنود العبدالله

حبآيبنآ وطآحت من غصون العمر ذكراكم
حبايبنا وناحت من غصون الذاكره ورقا
تعبنا نشعل التلويح في عتمات ميناكم
ولارجع لنا أنتم ولا أحلامنا
الغرقا
ورحنا نصافح أصوركم / رسايلكم
هداياكم
اليا مافآح عطر أشياءكم بكفوفنا العرقا
حبايبنا وكل ما أعشوشبت لحظه بطرياكم
تطيح دموعنآ من شانكم ولشانكم ترقا
رحلتوآ والطريق ال بروز أمانيه بخطاكم
يموت من الأسى مثل الأماني ليلة الفرقا
{ للشاعره : العنود العبدالله }

الصاحب

الصاحب اللي في خيالي مصور
لاغاب عن عيني بقى منه صوره
حبه مع الايام زاد وتطور
باقصى الضماير قام يبني قصوره
غلاه بعروقي مع الدم فور
وشوقه بقلبي زاد حالي خطوره
وشلون اصورشي ماينتصور
يارب يسرله و سهل أموره
::
لا اعرف اسم الشاعر

قال تعالى

حديث قدسي : "أنا ملك الملوك ، ومالك الملوك ، قلوب الملوك بيدي ، فإن العباد أطاعوني حولت قلوب ملوكهم عليهم بالرأفة والرحمة ، وإنِ العبادُ عصوني حولت قلوب ملوكهم عليهم بالسخط والنقمة ، فلا تشغلوا أنفسكم بسب الملوك ، وادعوا لهم بالصلاح ، فإنّ صلاحهم بصلاحكم

سنـــــــــــــــــــــــــــــابــــــــــــــل

سنـــابــــــــــل الخيـــــــر كلهـــا لــدول بــرا
.
.
.
والشعــــــــب لــه سنبله وحـــده ومـــاكــولـــه
.
.
.
الشاعر مجهول
):

رومانسيات شتوية

.

.

هي : حبيبي

هو : عيـــــونه .. هلا يا قلبي

هي : شنو تفكر فيه ؟ وين لاهي؟

هو : ولا غيرك يشغل البال .. أفكر فيك

في قلبها ياااااااااااااي

هي : أحس في خاطرك شي!!ا

هو : إنتي كل ما في خاطري .. إمواااااااااه

واااااااااااي عذبني هالريال

هي : صج حبيبي

هو : و أكثر من الـ "صج" بعد .. تعالي و شوفي خاطري بنفسك ما بتلقين غيرك ساكنه

هي : حبيبي .. ودك تشوفني ؟؟؟

قلبه طاح في بطنه .. لا تكفى مو الحين يا معودة .. يرحم لي والديك

زغرطي يا اللي معانا أحد يسوي شي يفصل الخط .. الو الو بوليس النجدة

هو : يااااه .. في أحد ما يتمنى أحلامه تتحقق ؟ اشلون لو كان الحلم الأجمل عيل

هي من بعد شهقة داخلية و قلب صار دمبك يرقع و أنفاس صاعدة نازلة

هي : ألحين حبيبي الحيـــــــــن !!ا

هو : هاااااااااا شنو الحين!!ا

هي : ألحين أبيك تشوفني الحين

هو : الحين؟

هي : إيه عمري فاجأتك صح؟

هو : هااا .. تقريبا

هي : يعني شنو تقريبا .. قول لي و لا تداري شنو شعورك الحين شنو تحس فيه ؟ أبي بالتفصيل

وجهها صار أحمر و قامت ترجف

هو :الله يـاخذه !!ا

هي : منو هذا اللي الله بياخذه .. انت اكيد معاي؟

هو : معاك حبيبتي معاك .. كلي معاك

بطنه قام يعوره

هي : أكيد هذا الحب حبيبي ليش إنه إعفسك :)؟

هو : لاااا .. هذا راجو

هي : هااااااااااااااااا !!ا

هو : راجو سايق المصبغة أخذ كل ثيابي

هي : يعني؟؟

و العيون تجدح شرار

هو : يعني بكل صراحة اسمحي لي .. الموضوع طلع من ايدي

هي : إنت من صجك؟

هو : و الطريج مسدود .. ما راح أقدر أشوفك

هي : أقــــــول

هو : قولي يا قلبي .. تامرين أمر .. عيوني لك

هي : يا عسى عيونك البط قول آمين .. مالت عليك و على راجو و على الساعة اللي عرفتني فيك

هو : لحظة حبيبتي لحظة

هي : اللحظة اللي عزرائيل ياخذ فيها روحك ارتاح أنا

هو : حبيبتي عندي خوش بيجامة يديدة توني شاريها من سوق المباركية

مرّة كيـــــــــــوت .. مسعود الإيراني حط كل خبرته و لمساته الفنية فيها

هي : صج ؟

هو : و النقشة بنيّة

.

.

طراااااااااااااخ

ترقع السماعة بوجهه .. و هو من عقبها قام يلبس بيجامته كل عصرية

و يفتر بسوق الحريم على أمل أن يصادفها!!!ا

.

تمّت

.

.

*زغرطي ياللي معانا .. عبارة مقتبسة من فيلم أبيض و أسود

للأمانة العلمية و الأدبية بس

.

.

.

طائر بلا وطن

ولا تسوى

.
.
شنو تسوى الحياة دون الأطفال؟
الله يا ثقل طينتها
الله يا كذبها .. يا نفاقها
و يا قلبها القاسي
.
.
ضحى .. لك قلبي كله
آه بس لو تدرين شنو تسوين فيني
شنو تفرحيني
شنو تنسيني نفسي
و اشكثر تخففين عني
و أحس معاك اني طفل
لا هم و لا تعب
و انتي ولا تدرين
.
ضحى انتي وااااااايد أحلى من الصورة
و سوري قصتك ما طلعت مثل ما هي بالواقع
:p
تذكريني بلولو الصغيرة
:))
من قال لك تستحين؟؟
بس تدرين .. و ربي قمر
و عسل و مربى توت بعد
:)

نبيـــها بيــــض

.

.
شنو اللي قاعد يصير بالبلد .. الغلاء شلخ مخابينا و الديرة كل مالها بالصاعد
ما يمدي الزيادة تجي من هني إلا و التجار جزر فينا من الصوب الثاني
ياهووو ما جت والله ما جت بعد
العن أبو داركم سعر البيض يرقع دبل .. لا حسيب و لا رقيب
صكني راسي و أنا أقرا الجريدة .. و لا و يقول اللي ما يتسمى 3 دنانير بالمستقبل
مادري هو ضعف ولا تواطؤ من الحكومة .. ولا جشع و طمع من التجار
خافوا الله يا ناس .. دبل عاد .. و الخير بقبال على العيش و الحليب
و الجبن و حتى الزقاير .. يعني فوق الهم تدخن عشان تنسى بعد ملعون خيرك
هم ميت من الزقارة و هم ميت من الهم و هم ميت جوع
و لا .. و انت مشتهي بيض بعد
.
.
على اللي يسوى و اللي ما يسوى سوينا مظاهرات و اعتصامات و شبينا شموع
و كل واحد فينا شال له سراي تقول قاعدين نحتفل بالمولد
نبيها خمس مو عشان البلد؟ مو عشان الشعب؟
شبينا شموع عشان كتاب تم رفض نشره
عشان حرية الرأي مو؟
سوينا اعتصامات بمعرض الكتاب
عشان القمع الفكري اللي حاصل .. أدري
و مصادرة حق الكتّاب و القرّاء صح؟
غرسنا أعلام و كامبينج على البحر و ديجيه
شنو بعد بقى ما سوينا له اعتصام؟
.
إحنا هالمرة نبي ناكل .. نبي نعيش .. ارحمونا شوي
ما نبيها بان كيك .. نبيها بيض .. بوعيون طماط مو مهم
ملح .. فلفل سود .. رمل .. كيفنا عاد
ما نبيها جبنة فرنسية .. دمياطي و يخب علينا
نتنة و بالدود .. عادي .. ما نشوف شر احنا
نبيها عيش ناكله على الغدا .. هونا عن الستيك
حتى لو عيش التموين .. لو عيش مصري تعقد تطحس أمك يصير نثري
ما نبيها تشيليز و لا أبل بيز و لا الشيرتون
مطعم هندي .. انشالله نجمة الجليب و اللي حواليك ياكلون كلهم من ربع .......ا
نبيها حليب لعيالنا .. سيريلاك شعبي .. اللي يصير
نبيها قهوة من دلة محلية .. يغور ستاربكس و ربعه
نبيها تمر محزر و خل التشيز كيك لأهله .. للتشيز كيك
نبي دشداشة نايلون المتر بنص .. نظام البس و قط
ما نبي انجليزي و لا بيجامة .. يعيش الوزار
البودي شوب يولي .. الله يخلي لنا الحواي و الطابوقة السودة
صابونة رقي يتوارثها الأجيال و لا تخلص .. و ممكن استخدامها لأغراض أخرى
تسند فيها الباب مثلا .. ايــــه بيبانا مافيها بريكات
اشحقة غترة دينهيل .. اشحقة شماق كارتير
الله يخلي لنا اليمني اللي مبسط عند باب المستوصف و دلاغات العايلة
نبي نعيش يا ناس
ما نبي بيوت ديلوكس .. و لا شقة بالشعب البحري
نبيها شقة غرفتين و حمامين و مطبخ و صالة
و الصبغ و الصحي علينا
وبالفريج اللي ورانا .. و أجار يرحم شوي يرحم لي والديكم
ايــــــــــه .. و أكيد يعني ويهي مو مال الشويخ و لا عبدالله السالم
كل شي بالصاعد .. العقار يشب ضو
أرض 400 متر جلحة ملحة توصل ميتين و ثلاث مية ألف .. على شنو؟
فيها كنز علاء الدين المفقود .. و لا مجاورة لبحيرة تطب عليها البجع
أقصاها لا صارت و بالشتا .. نقعة معفنة من المطر الجلب الأيرب ما يسبح فيها
.
إجرام والله إجرام .. يعني نبوق؟
عاد قلم شكله حرامي
والله اني قايل له خل نفسر أحلام ولا نسوي مركز اصلاح ذات البين
و حل المشاكل العاطفية و الإجتماعية حالنا حال اللي ترزقو و اللي
مترززين في كل مكان و عايشين على أفى المرضى و الغلابة
و التعابة و التعساء من البشر
كلها كم كلمة و كم جملة و عط الناس على جوها
و أهم شي تخلي كلمة"خيرا رأيت" على لسانك
و يا حبذا مع اللدغة .. تطلع أحلى
لا حول و لا قوة إلا بالله
.
إيــــه نبيها بيض
و خبز و جبن
أدري المظاهرة مو كول و مالت أعيال الفقر .. بس ترى احنا كويتين بعد
ماشاالله علينا صرنا افغانستانيين أكثر من الأفغانستانيين نفسهم
و عراقيين أكثر من العراقيين
و لبنانيين أكثر من أهلها .. عاد كلش لايق على وجيهنا
و أمريكيين تقول كل واحد معلقين سرته فوق تمثال الحرية
و مسلمين أكثر المسلمين
و مسيحيين مسكين عندنا البابا
و صايعين العن من أكبر خربوطي
و متحررين و ليبراليين و علمانيين و دينين و متطرفين
و ستعش الف مليون ملة
و إحنا كلنا خمسة ستة
.
يرحم والديكم نبي بيض بس
حتى اليوم متعشي خبز ايراني و جبن كيري و شاي
و لا .. من غير بيض
أنا قاعد أفكر أسوي حظيرة .. بس المشكلة حتى العلف مو مدعوم
يعني أوكلهم ولا أوكل نفسي و لا الكم بني آدم اللي مبطلين حلوجهم
و لا أبشرو بالأضحية .. ههههههه عاد مادري حزتها
أدفع قسط السيارة و لا أضحي
أتوقع النعية هالعيد بتشفط حق أقدعها لسكز ولا مرسيدس
بس كافي
أحد يشيل هاللاب توب مني أبي أنفجر
.
.
سامحني قلم كتبت عندك .. تدري أنا هوم ليس
أتمشى بالسكيك و أقيل بالبراحة و أنام يم الفرع
كود أحلم في بيض .. أو يتصدق علي واحد الله منعم عليه
مع إن الأشكال اللي عندنا ما توحي .. بأشوف لي فرع بمنطقة فايف ستارز
و أدري أمون .. و حتى لو ما أمون
ما تشوف شر هههههههههه
ايـــــــــــــــــــــــه الله المستعان

تصبحون على بيض
.
.
طائر بلا وطن
بعد ما دار عليه الزمن
هههههه